د پاکستان محکوم ولس ته څه کول پکار دي؟
لیکوال: اېمل پښتون
په بنو کې د ترهګرۍ ضد غونډه باندې برید د پښتنو د نسل وژنې تسلسل دی، چې له لسیزو راهیسې روان دی؛ عجیبه دولت دی، خلک سرکونو ته راوځي چې سوله وغواړي، بیا دولت پرې قتل عام شروع کړي، دا حال په بلوچستان کې هم دی.
د بلوڅ نسل وژنې پر ضد د بلوڅ پیوستون کمېټه د بلوڅانو ملي غونډه جوړوي، خو حکومت د ملي غونډې د مخنیوي لپاره خپل ټول توان په کار اچوي او ډېر تاوتریخوالی کوي؛ دا په بلوچستان او پښتونخوا کې حالات دي، چې پکې زرګونه کسان د دولتي ظلم او جبر پر ضد سړکونو ته راوتلي دي.
دولت د دې پر ځای چې د بلوڅو او پښتنو نسل وژنه پای ته ورسوي، پر سوله ییزو غونډو بریدونه کوي، خو د رسنیو، ژورنالیستانو او سیاستمدارانو په وړاندې په جنایي توګه چوپه خوله دي.
زه له بلوڅو او پښتون ملت څخه غوښتنه کوم، چې په خپل منځ کې اتحاد او پیوستون رامنځته کړي؛ په دې ډول به د ګډې مبارزې له لارې له خپلې خاورې دا ظلم او وحشت پای ته ورسوي.
دولت په عمدي توګه په سوله ییزو بلوڅو او پښتنو مستقیمې ډزې کوي؛ له بلې خوا همدغه ایالت د TLP له ډلې سره ګرم چلند کوي، د بلوڅو او پښتنو لپاره ټوپک او د TLP لپاره ګلونه د دولت د توکمپالنې د قانون ښکاره څرګندونه ده.
د پاکستان اوسني حالات او نا امنۍ تر ډېره د پاکستان د حکومت د خپلو پالیسیو نتیجه ده.
د پاکستان په پښتون میشتو سیمو کې د پوځ او آی ايس آی په خلاف، د خلکو کرکه او نفرت ورځ په ورځ زور اخلي او که حالات همداسې ادامه پیدا کړي، دا به د ړنګېدو مبداء وي او که پښتانه بغاوت وکړي، بیا یې د پاکستان دا پنجابی پوځ قطعاً نشي سمبالولی.
د پوځ له خوا په ولس مستقیمې ډزې، ۵ کسه وژل شوي، په درجنو، درجنو زخميان دي، د دغه ظلم پر خلاف د بنو ټول ولس له کورونو راوتلی او حکومت د موبایل سرویس او نېټ پرې بند کړی دی.
د پاکستان ولس دي په دې پوه شي چې ستاسې حال له فلسطین څخه سل ځله زېات خراب دی او ستاسې دښمن له اسرائیلو څخه زر ځله زیات ظالم او رزیل دی.
تر هغه چې د پېښور، چارسدې، سوابۍ، سوات، دير، ملاکنډ او نوښار خلک نه وي پاڅېدلي، د ظالم له ظلمه خلاصېدل محال دي، د پاکستان پوځ او آی ایس آی فکر کوي، چې د قبایلو کنټرولول دومره سخت کار نه دی؛ د پاکستان پوځ لکه د انګریز په څېر قومونه او د سیمو خلک یې په جنګیالي او غیرجنګیالي خلکو ویشلي دي.
د جنګیالیو پر سیمو نظامي عملیات کوي، ښځې او ماشومان یې وژني، کورونه او ودانۍ له یو مخې ورانوي او د غیرې جنګیالیو پروړاندې بیا داسې نه جبرانېدونکی جنایت ترسره کوي.
له یوې خوا په بنو کې پښتانه په دردناکه وینو کې پراته دي او له بلې خوا په دې بې ګناه زخمیانو او شهیدانو د خندا په ډول د دروغو د جواز په وړاندې کولو سره ډرامې روانې دي؛ پوځ او آی ايس آی په یوه او بله بهانه د پښتنو د سر سړي وژني.
په دغه هيواد کې به د بنو تر وضع لا نور حالات خراب او د داخلي جګړې درشل ته به ورسېږي، منظور پښتون او د ده ملګرو ته هم بېله نظامي پاڅون بله لار نه پاتېږي؛ د دغه ظالم نظام، ظلم عدم تشدد هم پر تشدد اړوي.
او له بلې خوا پاکستان اوس مهال د سياسي ګډوډۍ، د خراب اقتصادي حالت سره مخامخ دی او روپۍ يې په پرله پسې ډول تر فشار لاندې ده.
پاکستان پر ختمېدو دی او هغه ځای ته به ځي چي له هغه راغلی دی: و هېڅ ته!
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
